كتب هشام هلال في جريدة الدستور
...
..السنة الجديدة
..ورعشة برد 31 ديسمبر
..والمقالي ف الشوارع زحمة موت
..لب وسوداني
..ولحاف تقيل وطواقي صوف والدوا جنب السرير
..والريموت البلاستيك أبو زر ساقط
..ع الأولي والتانية
.."أكمنهم قطعوا الوصلة ولاد النكدية "
..وتحنيسة كل ساعة بمفاجأة نجم النجوم
..والناس مستوردة ف راسها بدون جمارك
..ومتراهنين
."كليب عمرو دياب الجديد..ولا كلمة لعمرو خالد..ياعم مش مكانه الليلة ..ما يجيبولنا رقصة لدينا.."
ونجم كل ربع ساعة متقطع فرحة ودعا-من غير وضوء-" يارب السنة الجديدة تبقي وتبقي علي جمهوري اللي واللي....." كلام عبيط.
..وتليفونات بترن
..وسنترالات بتقع
..ومافيش كلام اتقال من أساسه
..تيت تيت تيت تيت
..جاتلك مسيدج
..ياعم طزوالشوارع
..والشاورمة مشعوطة ف حلق الجعان
..والفتارين متلونة
Hppy new year 2006ومتعورة..ومكيسنها ب القطن الأبيض اللي كاتب
..والبياعات الشقيانات أمات حجاب
..!! وميك أب مزعق وصارخ
..مستنيات إذن صاخب المخل
."يارب نلحق المسرحية يا بت..ياختي قولي نلحق المترو.."
..وتستسات الكاسيتات..واللي يلحق صيدة الليلادي
واللي جاب وتاه منه المكان.."لخص يا حبيبي..ماتعطلنيش..الليلة موسم.."
.."طيب ..طيب..هاتي موبايلك أعمل مكالمة
"وقالتله "خد!!"
..ورحلة السيرش المقدس عن الجوانيت والسمسون
..والأسفلت المرشق إشارات ولجان
..عادي يا أسطي
..كله أونطة وف الكليتش
..والسما مشبرة
"زعلان يا رب مني..؟ طب يا رب..خدهم وسيبني.."
..وأجراس نيون بتترقص علي الماريوت والجراند حياة..يا صهبجية إيه يا لالالي
..وكوبري قصر النيل..غرقان زحمة رجول
..وعيال سيس بيرخموا علي كل شنتل-ماتاخدلك وردة يا كابتن- والمرسيدس شوارخ ع الطريق
..وهوانم موضبين شعرهم
..وبهوات منافيخ ولاوية بوزها
(ماللي يبقي بيه لازم يلوي بوزه..لأجل الناس تخاف تعوزه..)
..كوافيرات شطبت
..وسياس سيارات لسه حيبدأوا الاسترزاق
..وموبايل..موبايل بنص جنيه
..وبابا نويل بيتنطط أدام محل عبايات جديد
( ياخوانا إيه علاقته؟؟ جري إيه يا عم..صبح..مافيش تسامح ولا إيه..؟؟)
..وعيل اسمه مرعي شغال ف شركة أمن
..اترسم بنص دستة جاتوه من عند "باللو"-لابوار غلابة حيهم-ورباب خطيبته وأمها مستنينه بنص بطة محمرة
..ويحرق أم انفلونزا الطيور
.."بحبك يا بت..وإن شاالله أموت قتيل أو أخش المعتقل "
..والقيادات السياسية العيانة
-والأمنية السهرانة..-مش عشانك يا مصر..ده عشان يدوهم الدوا
..والجرايد لسه طالعة م المطابع سخنة نار
..زي الرغيف الحاف..مالهاش أي طعم
..والمانشيت الأحمر
..الرئيس مبارك يهنيء
..وإنت طيب يا ريس
..وكلاكسات
..وفرامل
..وشتيمة..وسب دين
..وبيرة اتفرقعت أكتر من البمب
.."زعلان منهم يا رب..؟؟"
..وف وسط كل العك ده
..عدي علي فرشة جرايد
..التقي إصدار جديد..الجزء الأول من فؤاد حداد
جابه وقرا.." موالي يحضر للعمل ف ميعاد وردية اللي استشهدوا إمبارح..وكل مصري في الميعاد يحضر.."
..فاستغطي..واداها-لا مؤاخذة-ضهره
...!! وقاللها..تصبحي علي خير يا مصر..أصل عندي شغل باكر
3 comments:
انا فاكرها لما اتنشرت
كانت هايلة بدرجة مش معقولة
ثانكس ياجميل انك تكبدت كتابتها ونشرها
ذوقك هايل
لا شكر علي واجب يا زعيم
انتي رائعة في اختياراتك بجد
اول مرة اسمع او اتخيل الكناية دي:
والريموت البلاستيك أبو زر ساقط
..ع الأولي والتانية
Post a Comment